Mas acerca del No Te Vayas de Zamboanga PDF Print E-mail
Friday, 02 May 2014 11:15

POR HERMENEGILDO PEREZ MALCAMPO, ED.D

 

Con este pieza literaria ya compositá durante la última parte del regimen Español na Zamboanga que ya terminá el 18 de Mayo 1899. Na su momento de nostalgia entre su madre patria y su adoptiva Zamboanga, el autor ta expresá derecho desde el corazon de un Español su profundo amor para su inolvidable y querida Zamboanga que ele nunca ay puedé salé y dejá. Este cancion ya quedá bien popular no solamente na Zamboanga sino na entero pais y hasta na Estados Unidos. El Capitan Loving quien en aquel tiempo era el director del American Constabulary Band ya compositá con este como una musica.

Quien si Juan Lopez Cuadrado?

Si Juan Cuadrado era un Español peninsular. Ele el autor de este poema No Te Vayas de Zamboanga. Si Cuadrado ya pasá su tiempo na Zamboanga durante el periodo Español. Su vida aqui era libre y contenta y sin novedad. Para con Juan Cuadrado Zamboanga era un pedacito de España una réplica de su lugar natal. Durante su estancia na Zamboanga ele ya serví como administrador de la hacienda pública—public finance y este era su trabajo hasta el fin del gobierno Español. Despues de la ocupacion por los Americanos, los Españoles voluntariamente ya salé para Manila en camino a su vuelta para España pero si Juan Cuadrado ya decidí quedá na Zamboanga donde ele ya preocupá su tiempo na negocio. Por ser hombre alegrote si Cuadrado ya establecé buena relacion de amistad y compañerismo y ya tené manada de amigos y ele ya quedá un favorito entre la flor y nata de la sociedad – flower and cream of society.

Por eso todos Zamboangueños debe oí y suportá con el apelo    que no hay suficiente razon para salé ya abandoná su lugar na Zamboanga. Despues de todo mucho semejante incidente trágico que ya sucedé mas antes pero la ciudad nunca ya fallá. Siempre, ya mové por delante y no por atras. Aquellos verdadero descendientes de su parentesco primitivo quien siglos mas antes ya sembrá su sagrao semilla para produci generaciones de pobladores en esta tierra anciana de Zamboanga debe todo pensá y considerá este apelo de los líderes.  — Tel. No. 991-1101