Chabacano o Chavacano? PDF Print E-mail
Wednesday, 25 June 2014 11:32

By HERMENEGILDO P. MALCAMPO, Ed.D

 

Cual el mas propio? Hasta ahora mucho ta confundí con este. Cual forma mas correcto? La verdad es que V o B, ambos forma puede usá. No hay ninguno ay cometé pecado si usá chavacano o chabacano. No hay prohibicion. Puede escogé segun su gusto. Masquin na Inglés ta permití ahora escribí enrolment o enrollment; puede dialogue o dialog. Chavacano es la forma original na Español. Ancina mi generacion ya aprendé escribí na escuela de cartilla, y por costumbre yo ta preferí escribí en esta manera pero tiene vez ta usá b. Despues de todo na España mismo donde ya originá el verdadero lenguaje Español no hay quien ta pronunciá v como se debe sino b. Como por ejemplo “vivo”. Todo na España ta pronunciá bibo, vaya – baya. Por eso con este letra v y dos mas – h , w no debe incluí na alfabeto de Español y de Chabacano porque no tiene propio sonido.

No hay lenguaje ta permanecé todo el tiempo exactamente igual desde el principio de su formacion. Na curso de tiempo ta tené que acceptá cambio na deletreo, acomodá nuevas palabras o componé manera de expresiones para hace aplicable y pertinente segun na necesidad del tiempo. Este una cosa inevitable na vida de un lenguaje. Pero no olvidá: Puede cambiá pero no destrosá.