1-Pacman party list para del masa PDF Print E-mail
Wednesday, 02 March 2016 11:23

EL COMENTARIO

BY dan toribio jr.

Buenas compoblanos y ciudadanos...

Taqui otravez el de ustedes servidor quien el manda turvia el lengua del losdemas por medio del mana articulo en chavacano que ustedes el puede le cadavez en cuando aqui na famoso periodico aqui na ciudad de flores.

Soles el cosa quita ta enfrenta y resulta ta seca el alreredor en particular ta man imut ya el Zamboanga City Water District na repartecion del agua potable na diferentes residencia.

En este calamidad solamente el diaton Creador el puede dale el solucion es llegar el tiempo del aguasero.

Por el diaton parte, el cosa solamente puede hace amo guarda y no hace usig agua.

* * * *

Monton ya el ya mira quita mana que se llama partylist quien ta representa conel diferentes sector na diaton sociedad.   El losdemas ta puede  quita oyi solamente durante el tiempo ta pidi sila el voto del publico y si elijido ya dol silencio ya.

El 1-Pacman partylist tiene el serioyoso intencion para conel masa o co nel entero paiz en particular conel sector del mana pobre.

El 1-Pacman patylist hende ta aguanta el congresista Manny Pacquiao despues ya deha le coneste largo tiempo ya el ya pasa porcausa ta desea tambien le queda senador este venedero election.

Si Dr. Mikee Romero un negociante y bien conosido amo el numero uno nominee del 1-Pacman patylist.

Unu del mana advocacia del 1-Pacman partylist amo el sports o deportes que es amo tambien ta suporta si Pacquiao.

Si Dr. Romero ya admiti este el su primer vez entra na mundo del pulitica y nohay le el bastante experiencia en este clase de trabajo pero desidido le usa su saber y abilidad para puede sirvi conel publico pormedio del partylist.

* * * *

Fuera con el sports o deportes, advocacia tambien del 1-Pacman el educacion y trabajo para de todo.

Na programa de sports o deportes, el 1-Pacman el descibri mana potentia jovenes players na mana barrio que puede competi na entero mundo masquin cosa pa juego.

Unu tambien este manera para manda desaleja conel mana jovenes na mana mal bisio como el droga projivido.

* * * *

Na programa de educacion, el dale tambien emportancia conel DepEd y CHED para omenta bastante pondo para compra mana omento facilidad y galamiton que puede usa el mana estudiante como el school buildings, computer, wifi y el library que es bien emportante para conel mana bata.

Entrao tambien na programa el bastante nutrition conel mana bata para tene sila buen salud y para puede estudia enbuenamente.

Para na programa na CHED el 1-Pacman concentra tambien na scholarship program que es un grande ayuda para conel mana pobre estudiante.

Target del 1-Pacman para tene manada quien el gradua na doctorate degrees.

* * * *

Programa tambien del 1-Pacman para dale trabajo conel mana nohay trabajo por medio del TESDA. Busca bastante fondo para omenta los necesidades del agencia por server conel public.

* * * *

El first nominee del 1-Pacman Dr. Romero bien confiansa puede le compli el mana plataporma del partylist especialmente el dalida de mana trabajo porcausa por largo tiempo nohay le ta agara posicion na gobierno monton ya del mana Pilipino con quien le ya dale trabajo pormedio del su mana compania o su mana negocio.

El senior Dr. Romero tiene el bastante abilidad y capabilidad con hancho experiencia na servicio publico porque hende imposible para puede le compli todo el programa del 1-Pacman.

* * * *

Todo quita tiene el derecho conquien escuji en este venedero election na Mayo 9 pero tiempo ya tambien para estudia enbuenamente el mana programa y plataporma del mana candidato y mana partylist conquien quita pone na puesto.

* * * *

Mientras tanto, el de ustedes servidor el “Pecho de Balinsungay” ta habla “pan vino-vino cada-y-cual su camino,” hasta na otro mana articulo que viene.