1-Pacman partylist: Juego y deportes contra na droga PDF Print E-mail
Saturday, 12 March 2016 13:53

EL COMENTARIO

DI dan toribio jr.

Asegun el palabra del losdemas, normal lang para conel ciudad tene problema de trafico porque es un señales del progreso.

Deforsi si progresao el un lugar monton tambien el numero del mana vejiculo el taman birarundi.

Pero el de ustedes servidor dol gende tanto ta agradese con ese creancia del losdemas porque el rason ta tene problema de trafico amo cae tiene cuantos tsuper abusao y palta saber si ta maneja vejiculo.

Un ejemplo solamente el recio quita ta mira na mana calsada donde amediante el apalestra del señales na mana urilyay como el “No parking,” pero monton lang siempre del mana vejiculo el ta puede quita mira parao apiqui pa na mana “road signs”.

****

El problema cadavez en cuando el otoridad ta cuji lang conel mana motorciclo, PUJ y tricycle solamente y tienevez ta actua como bulag para conel mana vejiculo de caro quien ta viola cuantos lei de trafico.

Ansina gat se aqui na Pinas y gende mas deve estraña.

****

Que manera ba conesos educa o diciplina? Simple lang. Implementa el mana leies de trafico nohay escujida masquin quien Sotano y Manggano pa sos.

****

El first nominee del 1-Pacman partylist si Dr. ikee Romero ya habla debe ya manda para conel problema de DROGA na entero paiz donde este clase de mal vicio aqui ta destrosa el futuro del mana jovenes quien el puede pa era tene buen vida algundia.

Porcausa deste, uno del mana advocacia del 1-Pacman partylist amo para toma interest conel mana jovenes na deportes  o juego para gende sila inclina na mal vicio.

Pormedio del deportes o juego, si Dr. Romero ya habla aqui el tene buen direccion el mana jovenes donde gende imposible el puede sila realisa el diila deseo na vida.

Plano del 1-Pacman partylist para lebanta el que se llama Department of Sports que el agencia el sale encargao na deportes.

Ta desea tambien el si Dr. Romero para tene nombre el paiz na Asian and Olympic Games algun dia.

Grande el creancia di Dr. Romero monton mana buen atleta aqui na paiz el problema solamente amo palta programa y suporta para con estos.

****

Mientrastanto, sabe ba ustedes que el veteran actor, Eddie Garcia, fadrasto di Dr. Romero?

Si Eddie Garcia ta suporta tambien el entrada di Dr. Romero na pulitica. Ele tambien ta sirvi como el quien ta dale consejo consu entenao si cosa mana debe hace para sale elijido na eleccion.

****

Grande tambien el suporta del mana PBA players conel 1-Pacman hasta aquelios de otro team egual conel famoso James Yap y otro pa.

Gende defisil encuntra suporta el 1-Pacman desde mana diferentes sector porcausa del deste advocacia y plataporma donde claro el beneficia el todol Pilipino especialmente el mana pobre.

****

Pero quiere hace claro si Dr. Romero que tres el decontodo prioridad del 1-Pacman partylist que es deportes o juego, trabajo y educacion.

Quemanera asegun encuntra trabajo si gende estudiao? Quemanera puede estudia si tiene mal vicio? O enfermoso?

Todo este man pregunta el puede contesta el mana programa  del 1-Pacman partylist.

****

Hasta na otro articulo mana compoblanos y ciudadanos.

Nohay rabiajan ha? Este comentario solamente del “Pecho de Balinsungay”.