El 1-Pacman partylist es un independiente PDF Print E-mail
Saturday, 19 March 2016 14:02

EL COMENTARIO

DI DAN TORIBIO JR.

Gunban, gunban, gunban…

Istrictamente dao ta implementa conel Comelec gunban na ciudad.

Pero el cosa quita ta observa puru lang GUN y nohay BAN!

Duele para habla pero el diaton ciudad ta queda ya “killing field”.

Maquin donde, masquin cosa hora ta puede lang tira gente y el duele alli tiene del mana victima ta muri gayot egual cosa ya pasa del mas reciente naTetuan.

Manada quita ta oyi reclamo desde conaquelios quien ta munta motorsiclo que cadavez sila pasa na mana calsada donde tiene checkpoint, sobra de istricto el mana otoridad quien taman checkpoint y dol lomismo contrario ya el diila trato conel mana motorista.

Tiene del losdemas mana otoridad ta perde ya el cortecia y respeto na mana motorista.

Ta abusa el diila poder y gende mas ta obedese cosa ta habla na proviciones del lei na mantenida de mana checkpoint.

Na y despues noy? Mana “gun-for-hire” libre lang carga pusil y tira gente?

Atius santisima hasta donde pa quita este?

* * * *

Despues ya abuya el cuantos istorya que tiene asegun tal grupo el man file disqualification case con el mana Party List el quien que se llama partisan o conectao na tal political party quien tiene solamente el vested interest groups, el campo del 1-Pacman partylist ya clarifica que sila “non-partisan” o nohay partido political     El 1-Pacman partylist nohay enbuelto politico solamente el mana nominees lang.

Ejemplo, el 1st nominee del 1-Pacman partylist si Dr. Mikee Romero, ele un negociante y un professor antes na mana Universidad de La Salle y Ateneo.

Este tambien el primer vez para entra na mundo de pulitica si Dr. Romero.

Nohay tambien el que se llama vested interest el mana persona na 1-Pacman partylist.

* * * *

El 1-Pacman partylist yah hace tambien claro que el congresista Manny Pacquiao unu de aquelios quien ta suporta con el partylist.

Mismo tambien si Pacquiao el apabor  conel plano del 1-Pacman partylist para hancha el deportes o juego hasta na mana barangay porcausa aqui ta puede guia con el mana jovenes para esta lejos na mal vicio como el droga projivido.

El 1-Pacman partylist es un independente y nohay ningunus del mana conosido politico el quien na detras aqui.

* * * *

Pero ansina pa man monton del mana politico el alegre conel mana flataporma del 1-Pacman partylist.

Nohay tambien quiere nombra el mana opicial del 1-Pacman partylist si quien-quien ta suporta canila porque gende pa este el tiempo para anuncia.

El 1-Pacman partylist el hace revive conel Emergency Employement Authority que es proyecto del antes president Diosdado Macapagal.

Es un programa que donde el dale trabajo con aquellos nohay trabajo para trabaja na limpiesa na mana rio, canal y mana calsada.

Simple lang este clase de mana plano pero grande ayuda este para con aquellos nohay trabajo y si limpio el alreredor lejos tambien na enfermedad el mana vivientes del tal lugar.

En este tambien manera el puede este menora el crimen que recio ta sosede na comunidad.

Hasta aqui ya lang tambien mana compoblanos y ciudadanos..