Permanente solucion na problema de nohay trabajo na paiz PDF Print E-mail
Saturday, 26 March 2016 14:50

EL COMENTARIO

DI dan toribio jr.

“Immediate, medium y long term solution” el plano del first nominee 1-Pacman party list si Dr. Dr. Mikee Romero na asunto na problema de trabajo na entero paiz.

* * * *

Porcausa bien hondo ya el problema na trabajo aqui na Pinas, necesita ya un party list el mira conel asunto para alivia el vida del mana Pilipino.

Si Dr. Romero junto conel 1-Pacman party list ay revive conel  Emergency Employment Agency o EEA que este ya existi durante el tiempo di Diosdado Macapagal cuando ele pa el presidente del paiz.

Este clase de programa ay puede este dale trabajo con aquelios mana verdad pobre y nohay trabajo.

Ay queda productivo el aquelios mana gente que pirmi lang ta hace lizo conel silya na casa o na mana tienda.

Pormedio deste programa ay puede tambien ayuda hace subi y vivi conel economia del paiz.

* * * *

Si Dr. Romero ay rempuja tambien le un lei para hace mas mapuerza conel barangay peace and order. Este el continua dale trabajo con aquelios mana nohay trabajo donde ay usa canila para man patroolia o man ronda na diila barangay durante el noche.

Todo quien el participa aqui ay recivi insentivo o sueldo.

En este manera ay mengua ya el ta sosede mana crimen ay tene pa trabajo el mana nohay trabajo y salvao pa aquelios ta bolbe denoche.

* * * *

Ta desea mucho si Dr. Romero el buen servicio conel mana Pilipino en particular quiere le encabasa na congreso para pirmi llijero el servicio conel mana Pinoy especialmente con el mana escases na vida.

Bien concierne tambien si Dr. Romero el estatura del man vcitima de mana calamidad como del tifun Yolanda que donde despues del cuantos año ya el ya pasa nohay pa siempre permanente casa el mana ya sale afectao.

* * * *

Si Dr. Romero junto conel 1-Pacman party list ay establisa conel Department of Sports donde en este manera ay puede gayot concentra y cuyda conel mana atleta.

Ay tene completo insentivo, propio que comer y educacion el mana atleta.

* * * *

Este tiempo de semana Santa todo quita resa y pidi conel creador para dale ya el aguasero canaton porcer bien seco el diaton alreredor.

Hasta na otro articulo..