Trabajo, estudio y deportes es cuantos solucion na pobresa PDF Print E-mail
Thursday, 31 March 2016 13:11

EL COMENTARIO

DI DAN TORIBIO JR.

Donde-donde ya ta puede quita columbra con mana politico el ta anda y ta precura convinci conel tal individual el diila voto el llegar el Mayo nueve votacion.

Pruba tambien quita pregunta canila especialmente aquelios mana ya sinta ya na posicion si cosa ba sila ya puede hace y ya lleva alivio conel mana pobre durante el tiempo talyi sila na puesto.

Y si nohay sila cosa yah ace, cosa man sila el ta plania hace si un ejemplo ay sale sila otravez elijido? Hace lang engorda diila “bala y ongca y cañon di Magellan?”

Emenda ya camo, trabaja ya para el bien del public nomas ya el bien diiño!

Acorda conel busung, pero el busung tamen ta tupa lang conaquelios quien ta cre na busung.

* * * *

Mentable el mana pobre durante el campaña pero sin a puesto ya ta hasquia ya hasta para mira conel mana pobre. Ansina gat se noy!

Tiene alli hace todo hasta palta nada ya lang come ya fuego para saca lang el atencion del mana votante.

Tiene alli masquin gende macarisas puru risas ya cadavez man atubang na mana gente “PLASTIC”.

* * * *

Cadavez-en-cuando ta enfrenta el paiz monton de problema como el rebellion, kidnapping y el vendida de droga projivido.

Porque ba el cuantos hermano diaton el ta queda malo el cabesa ta entra en este mana mencionao atrocidades? Ta bende shabu, ta ruba, ta man kidnap y ta entra na grupo de rebelde?

El rason amo el pobresa, nohay que cosa entiarca.

Poreso el 1-Pacman party list junto conel 1st nominee Dr. Mikee Romero ta introduci na diila plataforma de govierno el sports, job y education.

Ta mira si Dr. Romero que este tres mencionao cosas el puede lleva solucion y alivio conel mana Pinoy.

* * * *

El un persona gende mas pensa mala cabesa si ele tiene cosa ta encuntra cada dia para lleva na familia porcausa tiene le trabajo.

Quemanera ba puede obtene trabajo especialmente este mana tiempo? Deve el un persona es educao tiene titolo el cabesa que es cosa nohay otro quien puede rebata desde conele.

* * * *

No puede entra escuela cay flata el dinero del mayores. Alli el entra el deportes o juego.

Grande el oportunidad del un joven para puede queda scholar del tal escuela si ele el puede entra na tal juego o deportes.

Gende mas problema el dinero para na su estudio si ele un SCHOLAR ya del tal escuela porcausa entra le na deportes.

El momento ya puede ya gradua el persona ta curso que ele ay man enroll, alli gende mas problema el trabajo.

* * * *

Habla pa el los ancianos “el verdad riquesa del tal persona es amo el titolo na su cabesa”.

Bien para de todo el cosa quiere el 1-Pacman party list y si Dr. Romero porcer bien concierne le el estados del mana Pinoy.

* * * *

Hasta na otro articulo mana compoblanos y ciudadanos.

Last Updated on Thursday, 31 March 2016 17:44