Nohay quien puede destrosa con el 1-Pacman partylist PDF Print E-mail
Saturday, 02 April 2016 13:55

EL COMENTARIO

DI DAN TORIBIO JR.

Muchisimas gracias Señor Todo Poderoso por el corto hora de aguasero ayer por la aga. Alegre quita ya disperta ayer despues ya oyi quita el rumor del aguasero ta cai na diaton mana techo.

Ya alcansa por serca un hora el aguasero que ya puede ya muja conel tiera seco na alreredor.

Pero el mana siembrador y cainginero ta pidi pa mas de aguasero aber puede ya tambien sila comensa siembra producto agricultural que es amo quita todo necesita.

El aguasero ayer puede considera como un vendicion del Diyos para consu mana hijo y hija quien bien consequia ya aqui na mundo por el largo tiempo de secas.

* * * *

El palabra, “si el pono’y mangga manada maduru pruta, mucho el quien quierre hace sungquit”.

Este ahora el cosa ta aparese cuantos rumor que tiene tal grupo el quierre hace manera para decualifica con el 1-Pacman party list porcause asegun tiene dinero el quien ta encabesa con este ta refiri con el 1st nominee si Dr. Mikee Romero.

El contestacion con este el campo del 1-Pacman party list amo, nohay lei que ta habla si tiene dinero el un persona gende mas puede encabesa tal party list.

Ta admiti el campo del 1-Pacman party list que un negociante si Dr. Romero. Y como un negociante monton ya le cosa ya hace y ya ayuda na sector del pobre na paiz.

*  *  * *

Un ejemplo amo es mas de cien mil ya mana individual con quien ya puede ya dale trabajo y sinco mil mana scholars na diferentes escuela.

Uno tambien del plano di Dr. Romero amo hace el manera para limpia el problema de droga na entero paiz.

* * *  *

Mientras tanto, si sale elijido el 1-Pacman party list este venedero eleccion, si Dr. Romero ay hace representacion na congreso para lebanta el que se llama “Department of Sports” que es amo el quien ay encabesa conel deportes o juego.

En ese manera ay puede mas hancha el sector del deportes donde este agencia ay concentra solamente diila mana projecto na deportes.

* *  * *

Un asunto ya lleva na atencion di Dr. Romero un pregunta que es ejemplo gende ay suporta el su mana compañero na party list na establisida del Department of Sports?

El contestacion di Dr. Romero amo que ele tiene el abilidad para lebanta “consensus”.

Y tiene le capabilidad hace un “coalition para lebanta el mencionao plano de establisi el Dept. of Sports.

* * * *

Hasta na otro articulo mana compoblanos y ciudadanos..

Last Updated on Saturday, 02 April 2016 14:11