Donde ya el P58B para na calamity fund? PDF Print E-mail
Thursday, 14 April 2016 16:02

EL COMENTARIO

DI DAN TORIBIO JR.

Largo tiempo de soles o secas el ya pasa y el llegar tambien el tiempo de aguasero el man problema tambien el ciudad na asunto de avenida na diferentes calsada na ciudad.

Todo’l año ya man se ta sosede donde cadavez llegar el tiempo de aguasero y mana desague ta estanca porcausa del mana cuchinadas o basura que tambac adentro, amo se ta causa avenida na ciudad y amo tambien se el tiempo ta precura limpia el mana desague o drainage.

Atius santisima! Suguestion solamente del “Pecho de Balinsungay” cosa gaja ahora pa lang nohay pa llega el aguasero comensa ya ustedes limpia el mana desague o drainage alomenos llegar el tiempo aguasero gende mas tanto man avenida na ciudad.

Gende yo ta mam pa  sabe sino observacion solamente el cosa yo ta habla basi puede este ayuda conel concierne agencia del gobierno.

****

Despues el sangrino confrontacion na Kidapawan donde tres del maga pobre siembradores el ya sale muerto durante el protesta del mas reciente, el 1-Pacman party list ta pregunta donde ya y cosa ya pasa con el 58 biliones de peso que ya aloca el congreso para na calamity fund del El Niño.

Este mana pregunta del 1-Pacman party list ya bene despues brutalmente ya mata con tres mana siembradores seguiendo el diila protesta porcausa del sufrimiento na vida durante el secas donde nohay producto agricultural el ya salva.

Si Dr. Mikee Romero, el first nominee del 1-Pacman party list, ya habla que ya llega el calamity fund na mano del mana afectao siembradores siguro nohay quel sosede sangrino incidente que ya perde el vida del tres mana padre de familia di quien mana anac este mana tiempo el ta continua tan palipit el bariga na hambre.

****

Ta cre el 1-Pacman party list que gende el gobierno ta dale el bastante atencion conel mana siembradores masquin pa bien grande el diila contribucion na sociedad.

Si Dr. Romero ya hacegura que el momento sale eligido el 1-Pacman party list, ensiguidas ay repuja un programa para dale el propio atencion y mira si cosa deve ayuda dale conel mana siembradores na entero paiz.

****

Si Dr. Romero ya habla que gende mas deve pa pidi ayuda el mana siembradores na gobierno durante el secas. Asegun con Dr. Romero deve el gobierno ya el mira el situacion del mana siembradores quien nohay mas que quomer, nohay cosechas na diila siembra porcausa del secas.

Gende mas necesita pa limosna el mana siembradores conel gobierno considerando sabe ya se sila el situacion diila, asegun con Dr. Romero.

****

Si Dr. Romero ya habla que gende mas necesita pa documento o carta desde mana siembardores para conel gobierno aber puede alcansa canila el ayuda.

El 1-Pacman party list ay trabaja tambien para termina el existencia del “red tape” na gobierno que este el ta hace tormento el vida del mana ordinario Pilipino.

****

El observacion di Dr. Romero paraber el ayuda conel mana propio quien na necesita el ayuda donde ay pasa pa na bien largo proceso antes de llegar el asistencia conel tal persona y tienevez papel ya lang el ta recivi el concierne persona.

****

Hasta aqui lang tambien mana compoblanos y ciudadanos..