Corto y largo tiempo solucion na asunto de trabajo PDF Print E-mail
Saturday, 23 April 2016 14:02

EL COMENTARIO

DI DAN TORIBIO JR.

El 1-Pacman partylist preparao con el que se llama “short and long” term solucion na asunto de empleyo con el mana nohay trabajo el tiempo ya sale elijido este venedero Mayo 9 elecion.

Na short term solucion, el 1-Pacman partylist ay crea el que se llama “emergency employment.” Este manera el puede de dayun dale trabajo conaquelios mana nohya cosa ta hace na cada dia, ejemplo limpiesa na mana rio, canal y pusali.

Amediante del ta hace sila limpiesa, ay sirbi pa sila como mana “bantay linis” na diila cada-y-cual comunidad.

Este manera no solamente ta dale empleyo conel mana nohay trabajo, na mismo tiempo ta mantene pa el buen salud pormedio del limpiesa na alreredor.

*****

Paz y orden unu tambien del mana programa del 1-Pacman party list donde na campaña contra criminalidad aqui tambien puede crea empleyo.

Aqui ay implementa el emergency employment donde aquel mana nohay trabajo el tiene el animo yah ace canila miembro del un grupo na barrio quien el ayuda conel otoridad man ronda alreredor del barrio donde sila ta esta y hace el observacion  conel andansa diya’y noche.

En este manera ay puede ya mantene el paz y orden, ay tene pa trabajo el mana nohay trabajo.

Con el grupo ay llama como mana “bantay barangay” quien el trabaja junto conel barangay council na cada-y-cual lugar.

Aqui tambien ay puede controla o eradica conel problema de droga projivido na paiz.

*****

El momento sale elijido el 1-Pacman party list ensiguidas ay rempuja na congreso para revivi conel emergency employment program del antes president del paiz Diosdado Macapagal.

*****

Mientrastanto, na asunto del trafico, el 1-Pacman parylist ta mira deve asegun el gobierno basia el pondo na infrastractura como abrida del mana Nuevo calsada, hancha el MRT y LRT.

Deve asegun alcansa o guinda el LRT y MRT na entero Metro Manila y na mana sercanos provincial como el Cavite, Laguna, Cainta, Taytay, Bulacan y otro pa.

****

En este manera ay queda llijero el corrida del trafico y queda de fronto el biaje del mana vivientes del Luzon.

Egualmente el train necesita llega hasta na Bicol y La Union.

Deve asegun man alcansajan el train y mana pantalan para llijero el imbiada del mana cargamento y pasajero.

Hasta aqui ya lang tambien mana compoblanos y ciudadanos..