Tiene programa para del mana retirao y de edad PDF Print E-mail
Saturday, 30 April 2016 13:10

EL COMENTARIO

DI DAN TORIBIO JR.

El 1-Pacman partylist tiene tambien programa de trabajo para conel mana  retirao empleyao y senior citizen el momento ay sale elijido este venedero votacion.

Este un asunto ya habla el first nominee del 1-Pacman party list si Dr. Mikee Romero.

Por ejemplo, para conel mana maestro y maestra quien ya retira ya na diila servicio y despues quierre pa sila continua trabaja, ay dale otravez canila tiempo para continua trabaja y ensiña na mana escuela masquin gende mas el que se llama full time.

Pero aquelios quien puede pa gayot trabaja full time cai mapuersa pa el cuerpo, ay dale canila el plantilya posicion.

Si Dr. Romero ta cre el mana retirao maestro y maestra tiene el mas bastante experiencia y saber na esiñada na mana estudiante.

*****

Este ya llega na plano di Dr. Romero despues todo quita sabe palta mana maestro y maestra na entero paiz.

Si Dr. Roemro ya habla monton mana escuela el tiene manada estudiante  y palta el mana maestro y maestra.

*****

Para tambien na mana jovenes, Si Dr. Romero ya habla que tiene tambien plano el 1-Pacman party list dale el oportunidad para entra na que se llama “on the job training” na diferentes compania. Y como siempre tiene sila cosa el recivi para lleba na cada-y-cual familia.

Asegun con Dr. Romero en este manera ay man anad ya el mana jovenes trabaja hasta llegar el timepo puede ya sila empleya na regular pocision y gende mas sila ay tormenta busca empleyo porcausa tiene ya sila experiencia.

*****

Si Dr. Romero ya clarifica tambien que el 1-Pacman party list tiene el programa para hace abaja el pago del impuesto porcausa el paiz unu del mana nacion na entero mundo ta paga bien alto impuesto na gobierno.

Si sale elijido el 1-Pacman party list na congreso, ay lebanta un grupo si Dr. Romero quien estudia si quemanera hace bajo el pago del impuesto na gobierno.

Presentamente el quien ta encuntra P500,000 cada año, ta paga tambien treinta porciento impuesto donde bien grande ya gat se para con un Pilipino.

Ese cantidad de impuesto bien grande cosa ya se envez para del familia na gobierno ya lang ta guinda.

*****

Na asunto tambien de scholarship, miles ya el ta beneficia en este programa masquin nohay pa pocision si Dr. Romero na gobierno y este ay mas omenta pa el momento sale elijido na Mayo nueve.

Ay prepara grande fondo el 1-Pacman party list para na educacion.

El plano di Dr. Romero amo hancha el programa de educacion prinsipia elementaria, secondaria, colegio, masteral y doctorate.

Completo ya se para asensa el mana jovenes.

Cuantos durmida ya lang ay decidi ya quita conquien pono y quita na puesto.

Hasta aqui ya lang mana compoblanos y ciudadanos..