Marcos ta espera ‘black prop’ contra conele PDF Print E-mail
Sunday, 01 May 2016 14:45

EL COMENTARIO

DI DAN TORIBIO JR.

Amediante del mana que se llama “black propaganda” el ta abuya encontra conel Alcalde del Davao Rodrigo Duterte quien bien abante na survey, el aspirante para vice presidente Bong Bong Marcos ta esperanza tambien que tiene el semejante asunto ay abuya encontra conele que todo este tiene que hace el mana “oligarchs” desde na Metro Manila.

Base na mana survey, si Duterte ta abantia na total de 35% donde si Senador Grace Poe ta alcansa solamente na 22%.

Porcausa deste, cuantos del mana political analysts ta habla que palta nada ya lang man concede el losdemas mana contrincante di Mayor Duterte porcausa “poto-poto” ya sila na mana survey.

Mas ta aserca el dia del votacion, mas manada ya el se llama “black propaganda” el ta hace sale contra con Duterte donde puedeser el quien ta manipula aqui amo el mana “oligarchs” na Manila porcausa noquierre sila si Duterte el queda el seguiente Presidente del paiz cai gende sila puede  pone “pamitic”.

El mana “oligarchs” quiere que sinta na palacio el persona aquel ta habla “friendly” conel mana “oligarchs” pero si ansina el andansa donde si Duterte siempre el abante na survey, el mana “oligarchs” ay suporta mucho con Leni Robredo para queda el vice di Duterte.

Ta analisa el mana “oligarchs” si por ejemplo si Duterte el queda presidente y si Robredo el vice, ay tene scenario para pone abajo con Duterte y si Robredo el queda el presidente quien ta considera sila “friendly”.

Pero paraber puede sinta como vice presidente si Robredo, el campo di Marcos ta mira que el mana “oligarchs” ay atacca tambien con Bong Bong Marcos para destrosa conele usando el “black propaganda” mas pa cosa ta hace con Duterte para gende sale elijido si Marcos como vice presidente y si Robredo ay gana.

Por lotanto si serca posibilida Robredo man lampas con Marcos y gana como vice presidente,  tiene ay susede como se llama “political instability” . Si hende sila exitoso ase perde con Duterte, el mana oligarchs possible man “neutralize: con el  the Davao alcalde via “political instability” o hende ba impeachment como el nuevo presidente   El oligarchs hende ta tiene lastima con el maga pobre si tiene ya “political instability” na Pinas donde el vida de maga hente mas queda dipisil.

Preparao el campo di Marcos para enfrenta si tiene mana destroso ay abuya contra con Bong Bong Marcos na dias que viene antes el dia del votacion.