El voto para conel 1-pacman, es voto para na educacion, deportes y trabajo PDF Print E-mail
Friday, 06 May 2016 11:50

EL COMENTARIO

DI DAN TORIBIO JR.

Tres dias antes de llega el dia del votacion, el 1-Pacman party list ta apela conel vivientes el suporta para dale lugar na congreso aber puede servi conel mana Pilipino.

Si Dr. Mikee Romero, el first nominee del 1-Pacman party list, ya decidi entra na pulitica y ta rempuja el programa de deportes (juego) educacion y trabajo despues ya puede le observa que ta continua agrava el problema de droga na paiz y ta hace miserable el vida del cuantos familia Pilipino. Pormedio del mana programa del 1-Pacman party list si dr. Romero ta cre que ay puede este contesta conel necesidades del mana probre y dale solucion conel mensionao problema de droga projivido.

* * * * * *

Si Dr. Romero con grande creancia el deportes o juego ay desaleja conel mana jovenes na droga projivido donde ay queda sila ocupao en este actividad y nohay mas hora para na mal bicio. Fuera este, na deportes o juego ay puede pa descubri mana atleta quien ay compiti na mana juego na entero mundoy lleva grande orgulio conel paiz.

Si Dr. Romero ta cre que el un  persona tiene el buen salud llijero encuntra trabajo.

* * * * * *

Na asunto de educacion, el 1-Pacman party list el puede ayuda conel ciudad de Zamboanga pormedio del mana modern libro y mana computer para del mana estudiante como parte del programa del party list na entero paiz.

Para el informacion del vivientes, si Dr. Romero ta destribuji y ta dona mana libro na mana escuela desde antes pa el tiempo nohay pa le entra na pulitica y yah ace pa le mas aqui el momento ay sale elijido el party list na eleccion.

* * * * * *

Si Dr. Romero ya promote que ay trabaja le mucho para recuji mas pa fondo na deportes y educacion. Ay coordina si Dr. Romero na mana agencia de gobierno como el Presidential Social Fund y el Philippine Gaming Corporation o PAGCOR quien el man cooperajan na esfuerso del gobierno para na programa de scholarchip no solamente na mana curso de cuatro año sinu masquin na mana masterla y doctorate alomenos puede compete na mana otro nacion como el Singpore, Malaysia, Indonesia, Tahiland y otro mana nacio na asia.

* * * * * *

Para na sunto de trabajo, el 1-Pacman party list ta continua el plano para revive conel que se llama Emergency Employment Administration (EEA). Este el programa de trabajo del antes president del paiz Diosdado Macapagal. Este clase de programa amo ta dale trabajo conel mana probre familia para gende sila pasa el hambre cada dia.

* * * * * *

El voto para conel 1-Pacman party list es el voto para na deportes, educacion y trabajo for conel mana Pilipino na paiz. Si Dr. Romero quien un negociante, ya promete para implementa mana advocacia enseguidas el momento ay dale el lugar para sinta na congreso el 1-Pacman party list.