Evacuacion de algunos Subanos PDF Print E-mail
Friday, 29 October 2010 14:29

Maga Español ya llega na Zamboanga durante el reino di Timuay Saragan, el ultimo Subano jefe supremo del peninsula de Zamboanga. Si Timuay Saragan ta vivi arriba na monte de Pasonanca.

Despues de converti' con el maga Subano y Lutao na Cagang-Cagang, el maga misionero Jesuitas ya entra' na monte para converti' con los demas del maga Subano alli. Tiene no hay quere' accepta' el nuevo cultura. Estos ya desaleja' y ya move' mas lejos

para na monte. Un grupo que ya abandona' el lugar era si Dumulung y sus seguidores. Si Dumulung ya lleva' con su grupo na Maliwala el que ta llama' ahora Ayala. Alli ele ya funda' otro puablecito para su gente. Despues de su muerte al nombre Maliwala ya cambia'

na Dumulung pero el maga Español quien tiene dificultad habla' el palabra, ya hace' el nombre Dumalon. Cuando ya establece' el primer barrio y ya planta' el iglesia, el nombre Dumalon ya queda Ayala en honor del General Ayala. Pero con el mar na costa de Ayala ta continua' llama' hasta este dia Dumalon Bay.

Un dia dos vapor de Español ya anda' na Siukun (Siocon) para observa' con el lugar. Dos semanas despues, un grupo de soldao Español y un padre ya llega' para ocupa el lugar. Estos ya abre' un campo, ya planta' cuantos casas y un capilla cerca na bucana

del rio. Un dia tempranito, algunos Subanos ya abaja' para saca' nipa na mangle y con ocho de estos ya puede captura el maga soldao Español. Uno ya puede escapa' y ya reporta' con el jefe si Manughan quien talla na Sirawai. Al saber de este incidente, si Manughan en seguida ya llama y ya ajunta' con todo maga Subano valiente. Estos junto ya enderesa' para na campo del maga Español. Ya quema' con el campo y ya mata' con todo. Un jovencito ya puede's libra' por ser que ele Subano. El padre, masquin herido por el lanza, ya puede' escapa' para na barco pero con ele ya persigui' el maga Subano,
ya mata' y ya deja' su cuerpo segui'  na corriente del agua. No hay mas puede' encontra' el cuerpo de este si Padre Juan del Campo. El incidente 27 de Enero de 1650. Si Padre Juan del Campo era el segundo misionero Jesuita que ya muri na mano del maga Subano. Este ataque na Siukun era el primer señal de rebelion del maga Subano contra maga Español.

Si Padre Juan del Campo era el segundo misionero martir na tierra de Zamboanga.

By HERMENEGILDO P. MALCAMPO

Last Updated on Friday, 29 October 2010 14:48