El birada del Chavacano comentario na periodico PDF Print E-mail
Tuesday, 19 September 2017 13:38

EL COMENTARIO

DI DAN TORIBIO

Llegero pasa el tiempo, dol nohay lang dura tiene ya mas de un año nohay mas ustedes puede le mana articulo en Chavacano desde con el de ustedes servidor y comentarista “El Pecho de Balinsungay”.

El largo tiempo que ya pasa, monton del mana soseso el ya sosede y ta sosede pa na diaton paiz mesclao ya el mana desarollo y destorbo na paz-y-orden na comunidad.

Mana atrocidades que ta comete el cuantos del mana gente que envez trabaja para ayuda con el progimo, amo el ta queda problema na gobierno.

******

Pero habla pa mana “social” maca stress lang si ay conversa-que-conversa quita aserca mana problema, poreso mas megor conversa quita de alegria aquel que ta puede alevia el resuelio.

******

El de contodo engrande fiesta na ciudad que es Fiesta Pilar ta aserca ya tambien mana compoblanos y ciudadanos.

Fresco pa na mi memoria el tiempo mi edad de 5 para 12 año donde cadavez llega el tiempo de Fiesta Pilar ta lleva con migo el di mio nana na Portalesa del Pillar y ta hace came el diamon devicion con el Amparadora La Virgen del Pilar.

Cuntando conmigo el di mio nana el mana milagro que ya puede costa na vista del maga ciudadnos de antes del La Virgen, ta queda bien leviano el resuelio despues el reso que ta hace came na Portalesa.

Aquel tiempo porcausa cai bata pa yo, gende pa gayot yo ta puede entende el tiempo ya llega aqui na ciudad el image del La Virgen pero el cosa ta habla con migo amo que es el maga Español amo lleva aqui con el image.

Y desde aquel tiempo monton ya sosede mana milagro que ya costa na vista no solamente del un persona.

******

De saler na portalesa, ta lleva con migo dimi nana na cuantos lugar tiene que hace na celebracion como el mana tienda que amo se ta llama quita ahora el mana “travelling merchants” y otro pa.

Porcausa con el escases de dinero, hasta na Mirada ya lang came con el mana cosas ta bende y solamente ay queda yo elegre el momente ay compra conmigo mi nana el que se llama “cotton candy” que tiene diferentes color.

*****

Comparando de antes tiempo y de ahora, bien grande cambio gayot porque ahora cadavez llegar el Fiesta Pilar ta queda bien estricto el seguridad na ciudad y tienevez dol maca sentimiento ya porcausa el estricto seguridad ta queda ya deficil el andansa diaton mana verdad Zamboangueño quien ta sale bien afectao porcausa solamente el mal trabajo de aquelios mana atronao de otro lugar y ta bene lang aqui para hace atrosidades.

Pero nohay quita cosa puede hace de seguir ya lang el mandato el gobierno para el salvacion man dao de todo.

******

Hasta na otro articulo, como siempre el de ustedes servidor ta habla “Pan vino-vino, cada-y-cual su camino”.