El Chavacano Dialecto O Lenguaje
El Chavacano Dialecto O Lenguaje PDF Print E-mail
Monday, 12 February 2018 11:53

TICKLE ME PINK

BY Betty A. Elago

Muchas gracias Senor Hermenehildo P. Malcampo con tu escrito “Que Pasa’ que ta menciona tu con mi esposo Vincent Atilano Elago con alto respeto de conocer conele como un bien padre de pamilya, y de su alto integridad tiempo le ya encabesa el oficina del Turismo aqui na ciudad de Zamboanga. Muchisimas gracias otabes contigo!

Una bes en cuando, precura yo escribi en chabacano, para anima con de aton jovenes para aprende conversa el propio dialecto de chavacano. El Escrito de senor Malcampo ya manda yo le con mis hijas y hijos, pero no puede sila entende muy bien kay hondo el maga palabras ya usa si Senor Malcampo, mesclao de palabra espanol. Ya puede yo entende kay tiempo ya estudya yo na collegio, tiene yo 24 puntos( units) na lenguaje de espanol. Con Orgullo yo puede habla que yo un Zamboanguena masquin mi padre un Ilongo y mi  madre un Zamboanguena. Desde nina yo, ta conversa kame chabacano na casa, y hasta mi papa, pero ya aprende tamen yo conversa tagalog cuando na Manila kame ya queda soldao mi papa de aquel tiempo, y tausug, cuando ya lleba mi parientes canamun na Jolo para experiencia el vida tranquilo antes na Jolo!

Maka triste este maga tempo kay ta desparese ya el deaton dialecto o lenguaje ta habla sila. Mucho estrangeros de otra lugar ya gusta vivi aqui canaton, pero hende ta aprende conversa na chabacano! Poreso quita maga Zamboanguenos sy Zamboannguenas, debe continua conversa el propio chabacano! Sabe ba vosotros umalin oi si hende amo el maga palabras ta sale na de aton voca? Ejemplo que muchos beses yo ta oi menciona maga jovenes ,este… ka… donde ka anda? Imbes usa tu o bos! Sabe ba kamo o vosotros, el dialecoto de aton mesclao 80 porcientos espanol, mesclaco un poquito de tagalog, bisaya, y maga otros dialectos aqui na Pilipinas?

Bueno lang tiene quita un grupo, el Zamboanga de Antes ta manda o ta inspira con maga vivientes, viejo, vieja, o jovenes, para conversa el derecho chabacano para hende desparece na de aton ciudad! Ta esperanza yo que si Senor Malcampo continua contribui su saber en chabacano aqui na DZT!

Viva de aton Ciudad y el dialect Chabacano! Gracias!