Que Pasa? PDF Print E-mail
Monday, 12 March 2018 11:36

By Hermenegildo Araneta Perez Malcampo

Si. Algunas cosas que ta pasá na Zamboanga de estraño. Claro que desde el principio la cultura de Zamboanga bien Chabacano y los locales residentes acostumbrao oí cosas en Chabacano.  Pero el tiempo que ta estudiá maneras para retené y preservá este lenguaje como ta conversá, sin saber y un derepente el nombre del patron o patrona de las parroquias ya cambiá en Ingles sin tomar cuenta que muchos de las residentes ni el alfabeto de Ingles no sabe pa. Esta accion ta mandá mirá que no hay gusto con el Chabacano pues mas preferido con el Ingles. Ademas, no hay corazon para Zamboanga. De quien idea y mandato este? Quiere yo que llegá este na oido del portavoz del arzobispado. Como el na Pasonanca, en vez de Holy Trinity mas bueno era Parroquia de la Santisima Trinidad. El na Sta Maria era Virgen de la Purificacion. Ya abré mis ojos y ya conocé y mentable na familia si San Antonio de Padua. Al llegar ba Putik ya quedá St Anthony of Padua. Pero el no puede yo comprendé ni no puede cabé na mi conciencia el patron de Mercedes. Que modo ya quedá Lady of Ransom? Este nombre inventao y no hay nada de coneccion na lugar. Cualquier cambio ta tené alli ta afectá conmigo por bien o por mal porque yo nacido de Mercedes. Ta conversá de ransom (rescate) en relacion con el kidnapping  (robada de gente). No hay man alli roba con el La Virgen pues no hay razon para conversá de ransom. Na vida y historia de Mercedes ansina lo que ya pasá: el 24 de Septiembre  de 1876, cuando ya establecé con la iglesia, ya nombrá con La Virgen de las Mercedes (Lady of Mercy) como patrona. Poco tiempo despues, con el nombre Barrio  de Paso Caña ya cambiá na Barrio de Mercedes cuando ya formá el barrio. Por mas de cien años los devotos de alli ta celebrá con orgullo fiesta de Mercedes en honor de la patrona. Quiere yo preguntá con Padre Adriano Ruiz el párroco de alli: Que modo tu ta explicá el sentido de ese Lady of Ransom con los visitas y residentes de Mercedes? Un vieja ya hablá dao  “ansina ya gale. El mercedes ya cambiá ya dao na Lady of lump sum. Ta oi yo ese lump sum un golpe de grande sen ta recibí. Yo 84 ya y ta busca yo ayuda para mi cajón. Bueno pa La Virgen ta recibí gale lump sum”. Padre Ruiz, hace claro el di tuyo explicacion.

Yo ya abre mis ojos alli na Mercedes. Allí ya pasá mis primeros años de la juventud. Bien mapiaó con ese lugar. Ya correteá en todo rincon, hasta Lumbayao, Talabaan, ta andá pajariá hasta Culianan. Allí ya sale todos mis parientes – la familia Araneta, Perez, Toribio, Saavedra, Gonzales, Andres, Casimiro, Limen. Aunque aquellos de la primera generacion no hay mas pero esos que talli “todo- astillas del mismo tronco” (chips of the old block). Como la expresion: “antes que tu ibas yo venia” ( I was there before you). Para mi, siendo que de la generación anterior, yo ta menorá ya el ofició diario por la edad porque ta aproximá ya 82 pero sigue siempre andando “poco poco ralando el coco”. Ansina lo que ta pasá.

Buena suerte y recuerdos.