Barrio de Culianan PDF Print E-mail
Thursday, 15 March 2018 11:56

By Hermenegildo Perez Malcampo

Mucho nombre de los barrios  na Zamboanga ya salé na palabras de Subano como bolong quiere decir medicina, curuan – lugar donde ta butá  basura, cabaluay – lugar donde mucho arena o piedra blanco. La razon es que antes de  la venida de los Españoles, Subanos solamente los pobladores de Zamboanga y no hay mas otro tribu. Na un entrevista que yo ya puedé tene con Datu Roman  Endong de Zamboanga del Sur, un verdarero Subano y de alta profesion. Este si Datu Roman ya hablá que el nombre Culianan ya sale na palabra de Subano – culi-anan – quiere decir lugar de cura o place of healing en Ingles. Antes segun con ele, tenia un herbolario alli que bueno cura por medio de reso y hierbas. Alli mucho Subano ta anda para buscá cura de su enfermedad y dolencia. Por eso ese entrada que ta salé desde la carretera ta llama Pasobolong quiere decir el paso o el camino para medicina que es Culianan.

Conforme esta, tiene dos nuevo ya canonizá santos:  si Madre Teresa de Calcuta quien ya dale su servicio y vida por cuidar enfermos y pobres y si San Padre Pio, un monje religioso, quien por 48 años hasta su muerte ya sufri na su cuerpo cinco heridas incurables. Uno de estos puede ser el mas apropiado patron de la parroquia de Culianan.