Mi Amable Ciudad LATINO: Ber ya tamen PDF Print E-mail
Sunday, 04 September 2011 14:37

Di DAN TORIBIO, JR.

Largo tiempo ya nohay mas ustedes puede le este paborito articulo en Chabacano y yo ta pidi el despensacion con ustedes porque ya queda quita un poco de ocupao na otro mana cosa que ya tene quita que dale atencion.

Si meses de mana Ber ya tamen quita el que quere desir yo ya comensa ya el mes de Septiembre ta indica lang cay serca ya o ta entra ya el tiempo de Pascua o el comemoracion y celebracion del mana hermano y Hermana na religion Catholico es el tiempo de nacimiento del de aton unico Creador el Dios Todo Poderoso si Jesus Cristo.

Verdad que cadavez llega el tiempo de Pascua masquin paquemodo came mana pobre persona el queda man alegre masquin diutay lang el regalo ta resibi desde con mana tiene grande Corazon aquelios tiene lastima na mana pobre projimo.

Pero habla el los ancianos el tiempo de Pascua es el tiempo del mana Niño o mana bata porque ese el tiempo donde el de aton Dios ya aparese na mundo como un bata Nuevo nacido.

El de ustedes serbidor cadavez en cuando no puede entende si porque tiene cuantos mana bata o niño el tiene que supri aqui na mundo masquin nohay pa sila bastante ouicio. Yo ta  referi con el cuantos mana anak de pobre familia que puede yo mira talli ta supri, ta palta el diila comida cada dia y hesos mana bata que ta pidi limosna na mana calle aqui na centro y apuera del ciudad.

Tiene daw lei donde ta projibi con el mana gente para dale sen con esos mana limosnero donde tiene pena ay impone si con quien ay cuhi ta viola con el ordinansa, na pero gende quita puede inquita con el losdemas especialmente aquelios tiene buen corazon para con el projimo.

Pero como siempre ta pregunta yo si porque tiene ansina mana gente el quien debe supri ansina clase na mundo? Tienevez ta puede quita desculpa con el diila mana mayores si proque esos mana bata ansina ta experiencia na vida.

Despensa y no sale opendido el losdemas tribo, antes ta mira quita aquel mana quien ta pidi-pidi limosna na poblacion amo aquelios mana de otro lugar y gende Chabacano ta conversa, pero ahora ta sale quita espantao porcausa tiene ya hasta mana Chabacano bata el ta pidi-pidi sen na mana cantoy caretera egual como alli na dos mana botica na Nuñez y masquin alli parte na barrio de Tumaga! Perdona me alma pero aqui ta puede yo pregunta ansina y aba tambien de irresponsible de mayores el cuantos mana de aqui na Mi Able Ciudad Latino?

Heste el primer observacion lang del de ustedes umilde serbido y bisia tiene pa este segundo parte ay sale publicao na mana dias que biene.
Ta invita yo con el compoblanos para oyi na Wild 91.5 FM todo’l Domingo alas nuebe hasta alas onse del dia con el programa Hecho de Zamboanga, Muchisimas Gracias atodo!