Mi Amable Ciudad LATINO: Ber ya tamen (parte dos) PDF Print E-mail
Thursday, 15 September 2011 14:28

Di DAN TORIBIO, JR.

Na primer parte deste articulo (Ber ya tamen) ya discuti quita aserca el estado del mana bata con quien quita ta puede columbra na mana aserca y canto’y carretera el ta pidi limosna con el mana quien ta pasa o con aquelios quien tan compra n cuantos tienda na diferentes lugar na pueblo.

Donde ya estraña el de ustedes servidor si porque tiene de ese clase mana bata el ta supri na diila vida considerando con el diila edad y ta pregunta quita cosa ba el significancia del Pascua para canila siendo ese tiempo de nacimiento del diaton Creador y ta cre el mana Catholico amo es tiempo del mana bata.

Diferente el mana comento o reaccion del los demas compoblanos donde tiene diila el ta desculpa con el govierno y el otro ta desculpa con el destos mana mayores o porque esos mana bata ta supri na vida.

Na dimi personal opiñon y obervacion, el primero sabe quita muy bien que tiene un agencia de govierno quien el designao para mira el estado de esos mana gente ta esta na calle o carretera.

Cadavez en cuando, ta mira quita que el mana personajes del DSWD el ta colecta con esos mana gente quien ta esta na mana calle or carretera y recugi sila con estos na un centro alli na barrio de Sta. Barbara y asegun na lei alli con esos debe cuida para gende sos ay bira na mana calle.

Tiene alocao fondo el govierno para de esos mantencion cada dia. Pero el cosa quita ta puede sabe tiene de esos ta escapa lang desde alli na centro y ta bira otravez na diila custumbre de pidi pidi limosna na mana calle.

En este situacion cosa pa gaja el deve hace el govierno para con estos clase de carne-umano que anak tambien estos del Dios?

Antes de llega el tiempo de Pascua ta celebra quita el de contodo grande fiesta del ciudad es el Fiesta Pilar. Y si llega ese tiempo dol custumbre ya del mana agencia de govierno ta trabaja pormedio de recujir con estos mana limosnero na mana calle. Ese aber para gende daw macajuya con el mana bisita quien ay anda aqui durante el celebracion.

Na si ansina man gale ta puede con esos mana limosnero recuji durante el Fiesta Pilar porque, gende puede hace permanente?
El segundo opinion amo seguro culpa se del mana iresponsable mayores si porque tiene ansina clase mana gente o mana bata el ta supri na vida y ta aprende ya lang vivi como limosnero na mana calle del ciudad.

Era gane tiene quita lei egual na otro nacion donde requirido el mana mayores tiene solamente uno o dos anak para gende pasa tormento el vida del familia.       
Pero ta hace quita acorda que gende quita ta hace descriminacion con esos mana gente el cosa lang yo ta habla amo el debe servicio del govierno que esos ta merese y ese bajo a lei diaton.
* * * *

Na otro parte, ta dale yo mi saludo con el activo y trabajador consehal Miguel “Mike” Alavar III por su buen programa de busca lavida para con el ciudadanos. Junto con el USAID, si Mike como el vise presidente del FPAZ ta extende ayuda con el mana vivientes del ciudad y otro mana lugar pormedio de dale saber de busca lavida donde junto ele con Edsel Acuña el presidente del FPAZ ta insiña sila si quemodo mana proseso de aser comida como el diferentes clase vianda usando el pescao bangus y tamban.

El FPAZ ta existi ya por siete año y ta continua el diila libre servicio con el ciudadanos.

Mi slaudo con el FPAZ, USAID, y con canda Mike y Edsel y todo’l mana miembro del grupo.

Meses de maga Ber ya tamen debe quita esta alegre todo masquin poco lang ta recivi vendicion.

Viva Mi Amable Ciudad Latino, Viva Zamboanga!