Mi Amable Ciudad L A T I N O: Reso y devocion con respeto PDF Print E-mail
Saturday, 08 October 2011 15:11

Di DAN TORIBIO, JR.

RESO y DEVOCION este el propio cosa quita hace el andar na Fortaleza del Pilar.
Rendi quita las gracias por medio de resar con el Nuestra Señora La Virgen del Pilar porque taqui le na diaton ciudad por largo tiempo ya y amo ta ampara canaton todo y ta salva na maga posible calamidad.

El existencia del La Virgen del Pilar ta sirbi tambien de inspiracion canaton para continua el vida en paz.
El diaton devocion na religion de Romano Catolico debe continua y tiene quita el obligacion para dale tiempo para resa con el La Virgen del Pilar.
* * * *

Personalmente puede yo habla que desde bata ta acorda yo cadavez lleba con migo dimi nana na ciudad taman derecho came para na Fortaleza del Pilar y ta puede yo sinti que ta mira canamon el La Virgen del Pilar y ta oyi el diamon reso.

Hasta ahora y hasta para cuando el continua el diamon devocion con el La Virgen del Pilar y el mana seguiente pa generacion del familia.
* * * *

No solamente mana Romano Catolico el dale el creancia y devocion con el La Virgen del Pilar porque tiene tambien otro mana tribo y religion con quien quita ta puede mira el ta anda na Fortaleza para sendi candela con el La Virgen del Pilar.

Quere desir masquin quien puede hace el devocion y adora con el La Virgen del Pilar, porque todo quita man hermano y hermana y mana hijo y hija del Dios Todo Poderoso aqui na mundo.
* * * *

Ta pidi lang tambien quita pabor con cuantos mana jovenes si anda man na Fortaleza del Pilar, hace el propio devocion y no hace con el lugar para man inamorajan pate diila cadaycual pares.

Tiene quita ta mira cuantos mana pares-pares si anda alli na Fortaleza, envez resa talya na urilla taman abrasahan y taman inamorajan pate el diila nobio o nobia.
Ta pidi lang tambien quita con cuantos mana mujeres si anda tambien alli na Fortaleza, dale el proprio respeto con el La Virgen del Pilar especialmente na bestida de camisa.

Personalmente el de ustedes serbidor ta puede obserba tiene vez tiene cuantos mana mujeres si ta anda alli na Fortaleza dol nohay mas man gana besti camisa enbuenamente.

Tiene ta mira quita apalestra ya el detras y pecho y tiene ta abuya ya el raya entremedio del diila BUMPER. El bariga y pusut apuera tambien.
Tiene tambien corto calson lang ta besti bien ipit pa gayot, bien corto dol tapa-lodo ya lang el porma.

Na ese clase mana postura nohay mas se respeto na projimo y con el Fortaleza. Igual lang se antes na man iglesia del Romano Catolico gende el un mujer puede entra o gende con ele permiti el padre para oyi misa si ele gende ta besti el propio ropa de un mujer.

Na pero ahora hasta na mana iglesia dol noquiere mas gane tambien besti camisa el cuantos mana mojer poreso tienevez el padre dolt a perde ya el concentracion de hacer misa.

Gende man por comparacion, pero el losdemas mana religiones tiene gayot propio bestida con el mana mujer man o hombre si anda y entra na diila iglesia.
* * * *

Si quiere-quiere man besti ese clase mana que se llama “DES HONESTO” mana ropa, pabor lang no mas na mana lugar sagrao.
* * * *

Viva Nuestra Señora La Virgen del Pilar, Viva mi Ciudad de Zamboanga!