Maga incidente tragico na vida del maga Zamboangueño PDF Print E-mail
Friday, 05 November 2010 16:11

El Incendio de 1878

En un tarde de 1878, a las 6:10, un grande incendio ya registra' que ya quema' mucho casa de negocio na Calle Madrid mira para el mar. Este quema ya ocurri' na un dia bien memorable cuando el entero Zamboanga ta celebra' el fiesta del patrona del ciudad, La Inmaculada Concepcion y mientras que el procesion ta pasa' na maga calle del pueblo. Maga gente que ta segui' na procesion ya empeza'corretia' para todo direccion pensando que era juramentao. El imagen ya queda' abandonao na plaza en frente del iglesia. El fuego ya origina' na un casa de Chino donde ta celebra' un ocasion.

El Juramentao

El maga campaña militar ya puede' apacigua con el actitud de rebelde del maga nativo pero estos no puede conforma' y siempre ta busca' manera para venga'. Un medio que estos ya puede' pensa' es el caso de juramentao. Este persona decidido muri'. Despues de atende' un ceremonia de rezo y recibi' el consentimiento, este juramentao preparao para sale' afuera. Su unico mision es para mata' todo lo que puede hasta que ele mismo ay sale' muerto. Para con ele, este clase de muerte en seguida ya dale con ele el premio del cielo.

Na Zamboanga siempre ta tene' caso de juramentao desde el principio hasta 1970. El 6 de Diciembre, 1890, maga gente na calle ya empeza' corre' para todo direccion al oir el anuncio de juramentao.

Sin saber, este juramentao ya sale' na calle, bailando con su barung y ya hace apas con todo con aquellos na su pasada. Este ya puede tajia' cuatro personas na tiangue, dos ya muri dos dias despues. Pero este juramentao no hay puede' anda' lejos porque el maga
soldao y maga civilian armao todo ya sale' y ya hace' encuentro hasta que con este ya puede' mata'.

El Colera

Era durante el mes de Julio, 1891, cuando el enfermedad de colera ya ataca' na Zamboanga. Si ataque bien tragico. Na un dia mas de cien personas ta muri'. Aquellos quien ya muri': El alcalde del pueblo, un gobernadorcillo, el esposa del gobernador, el padre parroco de Mercedes. Con este padre ta ama mucho. Na Curuan ele ya

construi' un sistema de irrigacion para na sementera, ya planta' iglesia na Bolong, convento na Manicahan, casa de mision na Catumbal y na Cabaluay y por su iniciativa, ya abre' camino na maga barrio.