Pobresa y tormento na vida si porque ya man protesta mana siembrador PDF Print E-mail
Sunday, 10 April 2016 14:38

EL COMENTARIO

DI DAN TORIBIO JR.

Amo lang siempre el andansa na ciudad, rato-rato blackout, rato-rato nohay agua na mana gripo. Cadavez quita durmi el disperta ala mañana amo ya tambien el cosa quita ta experiencia.

Hasta cuando quita este ay sufri? Hasta para cuando ya ba?

Porque nohay gayot ningun politico ta conversa porcausa el problema de nohay coriente y nohay agua? Porcausa nohay mas gayot solucion coneste?

Deve ya ba quita pidi aucilio na otro mana paiz para ayuda coneste diaton problema? Macasumut ya man este clase de problema!  Bueno todo conversa pero hasta na conversada ya lang sila.

Nohay man cosa alivio el ta sosede.

* * * *

Pero el bien afectao aqui na problema de coriente y agua amo mana pobre solamente.

El mana pobre nohay generator para dale coriente na casa y nohay bastante lugar para saca agua.

Pobre el pobre hasta para cuando!

* * * *

Ta continua condole conel brutal matansa del tres pobre siembrador na Kidapawan City del mas reciente, el 1-Pacman partylist na liderato del first nominee si Dr. Mikee Romero.

Na mismo tiempo gende ta cre si Dr. Romero que el mana NPA el ya manda conel mana siembradores man protesta que ya resulta na matansa del tres persona.

Si Dr. Romero ta cre nohay quien ya manda canila para conduci el protesta y envez ta cre le solamente el hambre y pobresa amo ya rempuja conestos para dale mira el diila sentido contra conel govierno.

Si Dr. Romero ya habla que estos mana pobre Pilipino bien dejao na sociedad donde el govierno gende ta dale emportancia canila y nohay queber conel diila sufrimiento na vida.

* * * *

Grande el creancia di Dr. Romero el solamente solucion del problema del mana pobre siembradores amediante del soles amo dale entrampio de dinero el govierno canila aber puede sila man buji masquin nohay pa cosechas del diila siembra.

Si Dr. Romero ya habla no deve pa mas saca crisida na pago del diila entrampio el llegar el tiempo de pago.

* * * *

Duele para con Dr. Romero el duele muerte del tres pobre siembradores porcausa difisil ya el vida del diila familia y ahora ya perde pa padre de familia el diila mana anak.

Si Dr. Romero nu quierre oyi ansina clase mana soseso especialmente el ta sale enbuelto mana pobre persona.

Para con Dr. Romero deve el govierno nomas hace de novale nada el vida del mana pobre porque mana carne umano tambien sila que tiene el derecho vivi na mundo.

* * * *

Poreso ya decidi entra na pulitica si Dr. Romero pormedio del 1-Pacman party list amo para abre su mana mano para conel mana pobre Pilipino quien cadavez en cuando bien dejao na sociedad.

Necesita ya tiene un opicial na govierno egual con Dr. Romero y el party list aber para tiene quien mira el estado del mana pobre na paiz.

* * * *

Con el mana plata porma del 1-Pacman party list, tiene ya esperansa el mana pobre para alivia el vida.

* * * *

Hasta aqui lang tambien mana compoblanos y ciudadanos..